Karachi Wednesday, June 20, 2012
چاگردی کارکن ڈاکٹر رحیم بخش چَہ ناشرانی تیرگواری ءَ شھید بوتگ
کراچی : چاگردی کارکن ڈاکٹر رحیم بخش چَہ ناشرانی تیرگواری ءَ شھید بوتگ ۔ ھالانی رِد ءَ صدیق میتگ ملیر ءَ جاھمنندیں چاگردی کارکن ڈاکٹر رحیم بخش بلوچ مروچی بیگاہ ءِ ادار ءَ گوں عزیر ءَ ھمگرنچیں ناشر سھیل سالاری ءِ مردماں ھما وھدی تیر جتگ ءُ شھید کرتگ کہ آ ماں باون شاہ ملیر ءَ وتی کلینک ءَ نندوک اَت ۔ شھید ڈاکٹر یک سرگرمیں چاگردی کمکارے بوتگ آئی ءَ ناں ایوک ماں کراچی ءَ بلوچانی کمک کرتگ بلکیں نگیگیں جاوراں مکران ءُ بلوچستان ءِ دگہ ھند ءُ دمگاں ھم پہ وتی بلوچیں براتانی کمک ءَ ساڑی اَت ۔ جون دوھزار دہ ءَ مکران ءِ تیاب دپی دمگ ءَ اَتکگیں دلاب[ سائیکلون] پھٹ ءِ اسرمندیں مردمانی علاج ءُ دارو ءُ درمان ءَ ھم شھید گون بوتگ ۔ شھید بی این ایم ءِ کمکی ادارہ بلوچ کمکار ءِ باسک ، بلوچ نیشنل موومنٹ کراچی ءِ وائس پریزیڈنٹ محمد علی زیب ءِ برات ءُ بلوچانی نامی ئیں ٹک کلمتیاں ھوار اَت ۔ زانگ بہ بیت صدیق میتگ ملیر کالابورڈ ءَ چد ءُ پیش ھم گوں عزیر ءَ سیادی داروکیں ناشرکاراں چاگردی کارکنانی سر ءَ اُرش کرتگ آھانی اُرش ءَ گوستگیں ماہ ءَ لطیف بلوچ شھید بوتگ اَت ۔ ناشرکار ءُ صدیق میتگ ءِ مردمانی نیام ءَ اَڑ ءِ بنزہ میتگ ءِ اسکول ءِ زمین اِنت کہ ناشرکار آئی ءَ دستیگ کنگ ءُ آ اُود ءَ وتی ناشریانی بنجل جوڑ کنگ لوٹ اَنت ۔ چَہ نامے بلوچ ناشرکارانی بلوچ میتگ ءُ بلوچ چاگردی کارکنانی ٹپ ما ٹپ کشگ ءَ پد پہ کراچی ءِ بلوچاں اے جست ءَ سرچست کرتگ کہ آ دیمتر ءَ ھم عزیز ءِ چیرک ءُ غنڈھانی دست ءَ لیبوک جوڑ بہ بنت یا پہ وتی آسودگ ءُ ایمنیں باندات ءَ سیاسی ءُ سنچداریں راھے بہ شوھاز اَنت ؟ ناں انور بھائی جان ءِ ھون ءَ کراچی ءِ بلوچ مادنیں کشکے شون داتگ ناں لطیف ءِ بلے اُوست کنگ بیت کہ ڈاکٹر رحیم بخش ءِ شھادت پہ کراچی ءِ بلوچاں نوکیں سھبے بنا کنت ۔
Source:
