بلوچ راج، بلوچستان ءُ راج ءِ هــزاراں تبل ءُ کودک،  نـوک ورنــا ءُ ورنـا ، کمـاش ءُ پيريــں مــردم  انسان دژمنیں واکدارانی رستری سياسـت ءُ کارکردانـی آماچ  انت۰ بلــوچ ورنايانی دسگر ءُ بندی کنگ، آھاں تيرجنــگ، ٹپّی ءُ  تیری کنگ، اَرواھی ءُ جسمی شزا دیگ، درنجــگ ءُ لوپ کنگ، دست ءُ پادان اِش گُڈگ، شزاکُش کنگ ءُ  زندکا سوچــگ کینگی درآمدانی انسان دژمنیں کاراَنت۰ 

بلوچستانءِ بے شماریں شهیدانی کاروان سک دراج انت ءُ لَدیگی دژمن پہ بلوچانی چُک چِینی ءَ دست نداریت۰  ۲۶ اکتبر ۲۰۱۳ ( ۴ آبان ۱۳۹۲ ) ءِ  بامگاہ ءَ ایرانی زھرکنیں سپاھیگاں شانزدہ بیگناھیں بلوچ ورناے ءَ ماں دزّآپ ءِ زندان اَزاب کوش کت اَنت تنکہ چہ بلوچ راج ءُ سلھبندیں بلوچ ورنایاں وندہ بہ گِراَنت۰ 

شھید ناظر ملازهی – شھید مهرالله ریگی ماهرنیا – شھید عبدالوهاب ریگی – شھید حبیبالله ریگی نژاد شورکی – شھید سعید نارویی – شھید حامد وکالت – شھید سلمان میائی – شھید ایوب گوهرام زهی – شھید اعظم گرگیج  – شھید داود میربلوچ زهی – شھید حسن رضایی – شھید حبیب توتازهی – شھید ناصر شه بخش – شھید احمد دهمرده – شھید حسین براهویی و شھید نجیب الله بهادری ماں بلوچستان ءِ راجدپترا ابدمان بوتنت۰ 

  اے شانزدہ بے گناہ ءُ کم دروَریں بلوچ ورنا پنچ سال پیش ,  تھنا پہ وندہ گری ءَ اناگاہ  پاھو دیگ بوتنت۰  اشانی  لوگ مردمان اِش ھم سھی نہ کتگ اَت تاں چہ گُڈی دیدارءَ  زبہر اِش بکننت۰ اے شھیدان ءَ پہ “وصیت نامہ” یا کلوہ اے نبیسگ ءَ ھم موہ اِش نداتنت۰ 

اداں پدّرکنگی انت کہ دو روچ پیش چہ اے ورنایانی شھادت ءَ چنت  سپاھیگ ماں ملک ءِ زرباری بھرا کشگ بوت انت ءُ پارس ءِ لشکر ھمے بندیگیں ورنایاں کہ چنت سال ماں ایران ءِ کورچاتاں بندی اتنت،  میاریگ زانت ءُ درستاں ناڈاھی ءَ کشت انت ءُ  جاراِش پِرّینت کہ  سپاھیگانی مرک ءِ وندہ اِش گپت۰ 

ایرانءِ لدیگی واکداراں دگنیاے ءَ پیش داشت کہ انسانانی زندءِ ارزش ءُ جھانی کانود ءُ رھبنداں پہ آھاں ھچ انت۰ اے زھرکیں ناشراں دگنیاے ءِ مھلوک ءُ راجاں  کلوہ دات کہ پہ بلوچانی چک چیں کنگ ءَ ھر وڑیں نیمونے ءَ کارمرز کننت۰

بلوچستان ءِ پُلیں شهیدان ءَ هزاراں سلام
محمـد کـريـم بلـوچ
اکتبر۲۰۱۸