دادشاهءِ سرا، کم و گیش پانزده سال پیش " عظیم شه بخش" ءَ پٹ و پول کتگ و آئیءِ کتاب ( فارسی ءَ) دیر انت که شنگ بیتگ. عظیم مُلکءِ تها بیتگ و هموداں چه هما لهتے مردماں که گوں دادشاهءِ جنگاں هور بیتگ انت یا آ جنگانی زداں آتکه بیتگ انت و تا آئیءِ پٹ و پولءِ وهدءَ زندگ بیتگ انت، جست و پرس کتگ. آئیءِ پٹ و پول چو ڈاکٹر نصیرءِ پٹ و پولءَ یک نیمگی - چو که چه آئیءِ گپّاں ماں گدان ٹی ویءَ - نه انت. همے پَیما، " اکبر رئیسی" ءَ دادشاهءِ سرا پٹ و پول کتگ و " نیلگ"ءِ نامءَ ناولے نبشتگ و شنگ کتگ. اے دوئیں پٹ و پولکاراں، دادشاه اے پَیمیں مردمے که ڈاکٹر نصیر گشیت، شون نداتگ. همے دابا، چه دادشاهءِ ڈاه و آئیءِ کُشگ بَیَگءَ رند، هما وهداں " مولوی عبدالله پیشّنی " و " جان محمد" و رند ترا ، " مُلا ابابگر" ءَ شعر پِربستگ. مولوی عبدالله پیشّنی، زانتکاریں عالمے بیتگ، آئیءَ هم دادشاه بسّ یک دُزّ و قاتلے شون نداتگ. راست انت که دادشاه وانندهے نه بیتگ و آئیءَ په بلوچ و بلوچستانءِ آزاتیءَ جنگ نه کتگ؛ بلے چه اشیءَ کس انکار کت نه کنت که آ نا انصافیءِ خلافءَ توپک چست کرتگ و هماهانی دیما اوشتاتگ که آ ریپیینگ و بے عزت اِش کتگ. رندترا، جنگ دراجکش بیتگ و همے جنگءِ زدءَ، لهتے بے گناهیں مردم هم کُشگ بیتگ انت؛ بلے آئیءَ بلکیں همے فکر کتگ که آ دشمنءِ مردم انت. امریکائیانی کُشگ بیگءَ رند، ایرانءِ حکومت، آ دمگءِ حاکم و سرداراں - اشانی تها مهیم خان که پیسرا دادشاهءِ کمک بیتگ- گشیت که اگاں وتی خیرءَ لوٹنت گڑا دادشاهءَ مُردگ یا زندگ حکومتءِ دستءَ به دَیَنت. اے پیما دادشاهءِ جنگ گڑا گوں ایرانءِ حکومتءَ هم بیت۔