میان اُستمانی سیاست ءُ بلوچ راجی جنز ندکار: سعید بلوچ

میان اُستمانی سیاست ءُ بلوچ راجی جنز ندکار: سعید بلوچ

2020-03-21 08:07:26
Share on

توار 25 نومبر, 2018

ہمگام: نبشتانک

اگاں ما میان اُستمانی سیاست ءِ سرا ھُرت چاری بہ کن اِنت گڈا اے گپ سِھرا بیت کہ دنیا یک مزنیں تبدیلی ءِ نیمگ ءَ گام جنان انت۔ نوکیں لابی، نوکیں گروہ بندی ءُ ہستیں وھد ءَ اِستانانی نیام ءَ دوستی ءُ دژمنی میان اُستمانی سیاست ءِ تہا مزنیں جہلی ءُ برزی یے ودینان انت۔ اسرائیل ءِ مزن وزیر نتنیاھو ءِ ماں پاکستان ءَ دورہ ، ایران ءِ ماں مڈل ایسٹ ءَ دست مانگیجی، شام ءَ امریکہ ءُ روس ءِ دیم پہ دیمی ، امریکہ ءِ ایران ءِ سرا مالی پابندی ، اسرائیل ءُ ایران ءِ نیام ءَ جاورھالانی حرابی، ماں یمن ءَ ایران ءِ حوثی جنگجو آنی پشت ءُ پنائی، گوستگیں روچاں ماں ماسکو ءَ بوؤکیں امن کانفرس، کہ ہودا طالبانانی نمائندہ ھم بَہر زور انت۔ ون بلٹ ون روڈ ءِ پروجکٹ،( کہ چین ماں سرجمیں دنیا ءَ وتی انگیراں کنگ ءِ واب ءَ کندگ ءَ انت) میان اُستمانی سیاست ءِ بیم ناکی ءِ پدریں مثال انت۔ اے گپ تچک اِنت کہ میان استمانی کُلیں سیاسی جہل ءُ برزیانی سبب راجی نپ (National Interest) انت۔

مرچگیں دنیا ءِ راجکاری ءِ تہا ہر ملک وتی دفاعی پوزیشن ءِ مھکم کنگ ءَ سر ءُ پاد جنگ ءَ انت۔ دفاعی پوزیشن ءِ مھکم کنگ ءِ تچکیں مانا ایش انت کہ ہر استانے ءَ دومی استان ءَ چہ وتی راجی نپانی تاوان بار کنگ ءِ ترس انت، امریکہ ءِ ترس ایش انت کہ روس ءِ ماں مڈل ایسٹ ءَ آیھگ ءُ دزمانگیجی آئی ءِ راجی نپاں نقصان دنت، ایران ءِ ماں مڈل ایسٹ ءَ دزمانگیجی پہ اسرائیل ءَ نیکیں پالے نہ انت، ہمے رنگ ءَ چین ءِ ون بلٹ ون روڈ ءِ میان استمانی پروجیکٹ ناں پہ انڈیا ءَ نکیں پالے ناں پہ امریکہ ءُ آئی ءِ اتحادیاں۔

نو جست ایش انت کہ اے راجی نپ ءِ جنگ ءِ تہا یا میان استمانی راجکاری ءِ جھلی ءُ برزیانی تہا بلوچ راج ءُ بلوچ راجی جنز ءِ بستار چے انت؟ آیا بلوچ راجی جنز دنیا ءِ سیاسی جہلی ءُ بریانی تہا بلوچ راج ءِ نپ ءِ پھازگ ءَ سوب مند بیت یا ناں؟ یا بلوچ رہشون اے خطہ ءِ تہا پیدا بوؤکیں تبدیلی آنی درگت ءَ دنیا ءِ دیما یک فرقے ءِ دروشم ءَ وتی پجار ءَ کت کنت یا ناں؟ اے جستانی پسہ ءِ پول کنگ ءِ ھاترا مارا بلوچ راجی جنز ءِ مرچگیں جاورھلانی سرا چم شانکے دیھگ کپ ایت۔

بلوچ راجی جنز قومی جنگی ءِ دروشم ءَ چہ 2000 ءَ بندات بیت کہ تاں روچ ء مروچی وتی گڈی منزل ءِ نیمگ ءَ گام جنان انت۔ بلوچ راج ءِ وش بہتی ایش انت کہ بلوچستان یک انچیں جاہے ءَ Located انت کہ آئی ءِ سوب ءَ میان استمانی راجکاری ءِ تہا بلوچستان یک مزنیں ارزشتے ءِ واھند انت۔ بلے بلوچ راج ءِ بے تالئے یے ایش انت کہ بلوچ راجی جنز ءَ انگت میان استمانی راجکاری ءِ تہا اے وڈیں زورے نہ جتگ کہ چرائی ءِ سوَب ءَ دنیا بلوچ راہشون ءَ اے خطہ ءِ تہا ایک ”فریقے ” ءِ ارزشت ءَ بدانت۔ اے گپ زَپت انت بلے گواچنے کہ بلوچ راجی جنز وتی اندری جاورھالانی تہا بہر ءُ بانگ انت ۔ بلوچ راجی جنز ءِ تہا سلاہ بندیں تاگت بہ بیت یا سیاسی زور دوئیں نیمگ ءَ راجی جنز بے زور ءُ درْنگ درْانگ گندگ ءَ کیت۔ بلوچ گلانی نیام ءَ انگت داں راجی بیرک ءِ سرا یک مشتی نیست آ دومی و سیمی مزنیں جیڑہ آں بِل۔ اے گپ وتی جاگہ ءَ تچک ءُ راست انت کہ دنیا نزور ءُ درونگ درانگیں جنزانی پلہ مرزی ءَ نہ کنت، آئی سوب ایش انت کہ اگاں دنیا بلوچ راجی جنز ءِ پلہ مرزی ءَ کنت گڈا اے گپ سھرا انت کہ اے پلہ مرزی ءِ پشت ءَ دنیا ءِ وتی نپ است انت، ءُ دنیا وتی راجی نپانی پیلو کنگ ءِ ھاترا نزوریں ءُ درونگ درانگیں جنزاں گچین نہ کنت پرچہ کہ آیاں وتی راجی نپ ءِ پیلو بوؤگ ءِ Assurance لوٹ ایت۔ہر وھد یک جستے مئے گوشاں کپ ایت کہ ,,امریکہ پرچہ بلوچ راجی جنز ءِ پلہ مرزی ءَ نہ کنت,,؟ نو جست ایش انت کہ امریکہ پرچہ بلوچ راجی جنز ءِ پلہ مرزی ءَ بہ کنت۔؟ آیا اے خطہ ءِ تہا بلوچ راجی جنز امریکہ ءِ راجی نپانی پیلو کنگ ءِ واک ءَ داریت۔؟ اگاں انا، گڈا امریکہ پرچہ بلوچ جنز ءِ پلہ مرزی ءَ بہ کنت، اگاں آؤ گڈا بلوچ راجی جنز ءِ تہا اے واک ءُ تاگت مئے چماں پرچہ سھرا نہ بیت۔؟ سی پیک ءِ پروجکٹ سوب مندی ءِ نیمگ ءَ رؤگ ءَ اِنت، بلوچ سلاہ بندیں گلانی نیمگ سی پیک ءِ ھلاپ ءَ چوشیں ٹوئیں ارشے نہ بوتگ کہ آ میان استمانی رسانکدر ءِ تہا جاگہ بہ کنت، یا سی پیک پروجکٹ ءَ مزنیں تاوانے بدانت، تھنا چار مزدور ءِ سرا وت کشیں تراک اے خطہ ءِ تہا امریکہ ءِ خارجہ پالسی ءِ سرا اثر انداز بوت کت نہ کنت، پرچہ کہ اے رنگیں اُرشانی زور اِنچو نہ انت کہ آ ”سی پیک” پروجکٹ ءَ اوشت ءِ آماچ بہ کنت ، اشی ءِ وستہ مزنیں منصوبہ بندی ءُ مزنیں ارش درکار انت۔ اے رنگیں ارش ءُ منصوبہ مندی ءِ بنگیج ہما وھدا بیت کہ بلوچ سیاسی ءُ سلاہ بندی گل وتی اندری ہَڑ ءُ جنجلاں ءُ کست ءُ کینگاں چہ درکاانت ءُ یک مشت ءُ ھم دست بنت۔ اے رست انت کہ گوستگیں روچ ءَ کراچی ءَ چینی کونصل ءِ سر ءِ ارش ءَ میان استمانی رسانک در ءِ تہا کمے باز جاگہ کت ءُ اے ارش ءِ نوعیت ھم اِنچو کسان نہ اَت۔ بلے اگاں اے ارش ءِ چاریں پھناتانی سرا ھرت چاری بہ بیت گڈا اے گپ پدر بیت کہ اے ارش ءِ مول دنیا ءِ توجہ ءَ وتی نیمگ ءَ کشگ ءَ گیش لھتیں مردمانی Projection اَت کہ آ بی ایل اے ءُ آئی ءِ رہشون ءِ مقابلہ ءَ وت ءَ بلوچ مھلوک ءِ دیما منارینگ ءِ کوشست ءَ انت ءُ دنیا ءَ اے پروجکشن ءِ جنگ ءِ تہا اِچ Interest نیست پرچہ کہ اے پروجکشن ءِ گوازی بلوچ جنز ءَ گیش کمزوری ءِ نیمگ ءَ بارت ءُ دنیا وتی نپاں مھکمیں جنزانی تہا پَٹ ایت۔

ہمے رنگ ءَ بلوچ راجی جنز ءِ تہا ہر گروہ ءِ خارجہ پالسی چہ دومی گروہ ءِ خارجہ پالسیاں چہ چٹ جتا انت۔؟ نو جست ایش انت کہ کجام گروہ ءِ پالسی میان استمانی سیاست ءِ تہا جاگہ کنگ ءِ کنجائش دار انت۔ مثلاً بلوچ راجی جنز ءِ تہا ہما تاگت کہ گوں ایران ءَ نشتگ آیا اے تاگت اے خطہ ءِ تہا امریکہ ءِ نپاں گوں ٹکر وؤرگ ءَ نہ انت؟ اگاں آؤ گڈا امریکہ پرچہ بلوچ راجی جنز ءِ پلہ مرزی ءَ بہ کنت؟ اگاں اِدا اے جست پاد کیت کہ امریکہ پرچہ بلوچ راجی جنز ءِ تہا ھما گل ءِ پلہ مرزی ءَ نہ کنت کہ آ ایران ءَ وتی دژمن ءُ وتی سرڈگار ءِ زورگِر سرپد بنت؟ گڈا اے جست ءِ سرا اے جُست چست بیت کہ آیا اے گل انَچو طاقت وریں کہ اے خطہ ءِ تہا امریکہ ءَ چہ پاکستان ءَ گشتر نپ دات کرت کنت؟ ادا اے گپ وتی ارزشت ءِ مالک انت کہ اے خطہ ءِ تہا اے وھد ءَ پاکستان امریکہ ءِ نپاں پیلو کنگ ءَ انت اگاں امریکہ ایران ءِ ھلاپ ءَ پاکستان ءَ کارمرز بہ کنت اے پہ امریکہ ءَ گیشتر نپ انت بہ نسبت امریکہ بلوچ راجی جنز ءِ تہا یک گلے ءِ ایران ءِ ھلاپ ءَ پلہ مرزی ءَ بہ کنت۔ پرچہ کہ بلوچ گَل یک مشت نہ انت ہر یکے ءِ وتی جتائیں ایجنڈا ءُ پالسی انت، ہمے سوب انت کہ روچ پہ روچ نوکیں گل ءُ گروہ جوڑ بوؤگ ءَ انت کہ اے گیشتر بلوچ راجی جنز ءِ تاگت ءَ نزور کنگ ءَ انت۔ انچو کہ من برزا گشت دنیا پرشت ءُ پروش ءُ نزوریں جنزانی پلہ مرزی ءَ نہ کنت پرچہ کہ پرشت ءُ پروش ءُ نزور ایں جنز دنیا ءِ نپانی پیلو کنگ ءَ سوب مند نہ بنت۔ اگاں کسے اے خوش فہمی ءِ آماچ انت کہ امریکہ انسانی رشتہ ءِ بنیاد ءَ بلوچ راجی جنز ءِ پلہ مرزی ءَ کنت گڈا گوستگیں روچ ءَ امریکہ ءِ صدر ڈنلڈ ٹرمپ ءِ نیمگ ءَ داتگیں بیان ءِ سرا چم شانکے بہ دانت کہ آئی ءَ جمال کشوگی ءِ کوش ءِ بابت ءَ داتگ ات۔ کل دنیا یک آواز اِنت کہ امریکہ سعودی ءَ کشوگی ءِ کوشارینگ ءِ سزا ءَ بہ دانت۔ بلے ڈنلڈ ٹرمپ ءِ گُشگ اِنت کہ منی واستہ کلاں چہ پیش امریکہ ارزشت داریت ، آ گشیت کہ کشوگی سعودی ءَ کوشارینتگ یا ناں بلے امریکہ ءِ گوں سعودی ءَ نپ بندوک انت پمے ھاترا ماں کشوگی ءِ کوشارینگ ءِ جیڑہ ءِ سرا سعودی ءَ نارز ءَ کت نہ کن انت۔اے گپ ءِ منارینگ ءِ ھاترا دومی دلیل اش انت کہ مرچی یمن ءِ تہا 85000 گونڈو{تپل} جنگ ءُ جدلانی سوب ءَ ساہ کندن ءِ گرانیں سھّت آں ساہ گرِ ءِ راہچار انت۔ بلے آمریکہ ءُ دنیا ءِ اے دگہ ملکاں سُدّے پِر نست پرچہ کہ اے تپلانی مرگ ءَ گوں امریکہ ءُ دنیا ءِ نپ بندوک نہ انت۔

بلوچ راجی جنز ءِ تہا دگہ یک گروہے کہ آ بلوچستان ءِ آجوئی ءِ ھاترا گوں ایران ءَ ساز ءُ باز کنگ ءَ انت، بزاں ایران ءِ دست ءَ کارمرز بوؤگ ءَ انت۔ اے مھلوک ءِ گشگ انت کہ ماں ایران ءِ کمک ءَ چہ پاکستان ءِ زورگِریں بلوچستان ءَ آجو کنیں، منی نِزا اے کندگی گپے پرچہ کہ پاکستان ءِ زورگریں بلوچستان ءِ آجوئی پہ ایران ءَ نیکیں پالے نہ بیت، اے گپ ءَ ایران شر پوہ ءُ سرپد انت۔ ایران ھجبر پاکستان ءِ زورگِریں بلوچستان ءِ آجوئی ءِ پلّہ مرزے ءَ نہ کنت، آ زانت کہ پاکستان ءِ زورگریں بلوچستان ءِ آجوئی ءِ اثر تچک ءَ ایران ءِ زورگریں بلوچستان ءِ سرا کپ انت۔ ایران اے گروہ ءَ جیش العدل ءِ ھلاپ ءَ کارمرز کنگ ءُ وتی نپاں ءَ کشگ ءَ انت، وھدے کہ اِدا ایران ءِ نپ پیلو بیت، آ ھما دمان ءَ پاکستان ءِ ہمکاری ءَ گوں اے گروہ ءِ ہنڈالاں بران کنت۔

اے گروہ ءِ گوں ایران ءَ ساز ءُ باز پہ بلوچ راجی جنز ءَ مزنے توانے، ایران ءِ دست ءَ کارمز بوؤکیں کلیں گروہ {پراکسی} دنیا ءِ چماں ناشرکاریں گروہ ءِ بستار ءَ چارگ بنت۔پرچہ کہ اے گروہ آنی زریعہ ءَ ایران ناشرکاری کنگ ءَ انت، ھمے وستہ مرچی ایران پہ دنیا ءَ یک سر دردے جوڑ بوتگ۔ اے گپ گواچنے کہ اسرائیل ءُ امریکہ نو ایران ءِ سرا ارش کنگ ءَ دیر نہ کن انت۔ نیوکلیئر ڈیل ءِ ھلاسی ءِ جار ءُ مالی پابندیانی ودینگ ارش ءِ تیاریانی نیمگ ءَ ساپیں اشارہ انت۔ اے جاورھالاں ابید ایران ءَ گوں ساز ءُ باز ءِ ساپیں بزانت اے خطہ ءِ تہا امریکہ ءِ نپ ءِ دیما میلانک بوؤگ انت۔ اے گپ چہ کس چیر نا انت کہ ایران ءِ ھلاپ ءَ امریکہ ءِ یک ہھتیارے سعودی انت ءُ سعودی ایران ءِ ھلاپ ءَ جیش العدل ءِ پلہ مرزی ءَ کنت۔ نو اے گپ پدر انت کہ بی ایل ایف ءُ گلزار امام گروہ ءِ ماں جیش العدل ءِ سرا ارش تچک ءَ امریکہ ءِ نپانی دیما میلانک بوؤگ انت۔ امریکہ ءِ نپ ءِ دیما میلانک بوؤگ یقیناً پہ بلوچ راجی جنز ءَ نیکیں پالے نہ انت۔ سویت یونین ءِ پرشت ءُ پروش ءَ پد دنیا ءِ لگام امریکہ ءِ دست ءَ اتک کہ تاں روچ ء مروچی آ میان استمانی راجکاری ءِ تہا کلاں چہ ٹوئیں کارست انت۔ اے راست انت کہ روس ءَ ھم میدان ءَ دور کتگ کہ آ چین ءُ ایران ءِ ہمرائی ءَ دنیا ءِ لگام ءَ چہ امریکہ ءَ پچگر لوٹ ایت، ماں شام ءَ بشارلاحسد ءِ حکومت ءِ پچارینگ ءُ ماں ترکی ءَ فوجی بغاوت ءِ ناکام کنگ ءُ ماسکو ءَ امن کانفرنس ءِ صدارت کنگ(کہ ہودا طالبانی نمائندہ ھم بھر زور انت، اشی ءَ چہ ساپ پدر انت کہ دیم ترا روس افغانستان ءَ امریکہ ءِ نپانی ھلاپ ءَ وتی گامگیجاں بنگیج کنت) ھمے لگام ءَ چہ امریکہ ءَ پچگر ءِ ءُ وتی کوہنیں بستار ءَ بحال کنگ ءِ کوشست انت۔ روس یک رندے پدا سپرپاور بیت یا ناں؟ دنیا یک رندے پدا دو بلاک ءِ تہ ءَ بھر بیت؟ یا دنیا ءِ لگام ءِ یک بہرے روس ءِ دست ءَ بیت ءُ یک بہرے امریکہ ءِ ؟ اے انچیں جست انت کہ اے جستانی پسو ءَ آؤکیں وھد دنت۔ بلے استیں وھدا تاگت امریکہ ءُ آئی ءِ اتحادیاں گون انت۔ اے گوچن ءَ کس رد کرت نہ کنت کہ دنیا ءِ ہرکنڈا جغرافی تبدیلی یا راجی آجوئی ءِ سوب مندی گوں امریکہ ءُ آئی ءِ اتحادیانی مرضی ءُ منشا ءَ بندوک انت۔ بلوچ رہشون ءِ دیما جست اے اِیر اِنت کہ آ ہست ایں وھد ءَ میان استمانی سیاست ءِ تہا اے ٹوئیں کارست ءِ نپاں بلوچ راجی جنز ءِ تہا چون درگیج ایت۔؟ منی نزا اے کار ءِ واستہ کلاں پیش بلوچ سلاہ بندیں گلاں یک مھکمیں الائنسے جوڈ کنگی انت کہ آ راجی جنز ءِ تہا کلیں گروہاں یک جاہ بہ کنت ءُ اندری جیڑہ ءُ پرشت ءُ پروشانی توجیل ءَ دربگیج ایت۔ ہمے پیما سیاسی پِڈا ھم یک منظمیں یک مشتی ئے درکار انت کہ آ میان استمانی ءُ گرونڈ ءِ اندرا بلوچ راجی جنز ءَ Represent بہ کنت ءُ اے الائنس ءِ ٹائنتگیں پالسی کلیں گلانی پالسی بہ بنت، کلیں گل راجی نپ ءِ ھاترا یک پالسی ءِ سرا یک جاہ بہ بنت۔ مرچی بلوچ راجی جنز ءِ تہا یک گروہے ایران ءَ گوں ساز ءُ باز کنگ ءَ انت، دومی تاگت وتی پالسیاں میان استمانی لوٹ ءِ پدا ٹائینگ ءَ انت۔ دگہ یک گروہیے لشکر ءِ جنگھوئی ءَ گوں نشتگ۔ دومی تاگت اے پالسی ءِ ھلاپ انت۔ جست ایش انت کہ کجام پالسی راجی نپ ءَ پہ پائدگ مند انت۔؟ یقیناً ایران ءُ لشکر ءِ جنگھوئی ءَ گوں ساز و باز بلوچ راجی نپاں تاوان بار انت۔ بائید ایش انت کہ ھما پالسی ءِ سرا یک مشتی بہ بیت کہ آ راجی جنز ءَ پہ پائدگ مند انت۔ بزاں بلوچ راجی رہشون ءَ امریکہ، اسرائیل ءُ سعودی ءِ لابی ءِ تہا وت ءَ یک فرقے ءِ بستار ءَ منارینگی انت۔ بلے چوش کہ من برزا ذکر کت دنیا ءِ دیما وت ءَ فریقے ءِ بستار ءَ منارینگ ءِ ھاترا ترا یک منظمیں تاگتے ءِ دروشم ءَ دیما آیگی انت کہ اے وھدا آ تاگت بلوچ راجی جنز ءِ تہ ءَ گندگ بوؤگ ءَ نہ انت۔

اسرائیل کہ پاکستان آئی ءِ وجود ءِ منگ ءَ ساڑی نہ انت بلے اسرئیل ءِ مزن وزیر ایران ءِ ھلاپ ءَ (وتی راجی نپ ءِ ھاترا)گوں پاکستان ءَ گپ ءُ تران ءَ ساڑی بیت اگاں بلوچ راجی جنز ءِ تمامیں گل ءُ گل ءِ رہشون منظمیں دروشمے ءَ ایران ءِ ھلاپ ءَ یک مشت ءُ ھم دست بوتین انت گڈا اے شک درگزر کنگ نہ بیت کہ اسرائیل ایران ءِ ھلاپ ءَ پاکستان ءِ بدل ءَ گوں بلوچاں نشتگ اَت انچو کہ اسرائیل ایران ءِ ھلاپ ءَ کردانی پلہ مرزی ءَ کنگ ءَ انت۔ بلے ارمان کہ بلوچ راہشون میان استمانی سیاست ءِ لوٹانی پیلو کنگ ءَ بے سوب بوتگ انت یا وتی اندری جیڑہانی سبب ءَ میان استمانی راجکاری ءِ تہا یک کردارے جوڑ بوؤگ ءِ چانس ءَ چہ زبھر بوھگ ءَ انت کہ دیم ترا اشے ءِ زھریں ثمر بلوچ راجی جنز ءُ بلوچ ءِ راج ءِ سرا میلانک بنت۔

ہر 50 , 60 سال ءَ پد دنیا ءِ تہا جغرافی تبدیلی آرگ بیت، مرچگیں میان استمانی سیاست ءِ تب ءَ چہ ساپ پدر انت کہ دنیا ءِ تہا انچیں بدلی آرگ بوؤگ ءِ کوشست کنگ بووگ ءَ انت کہ اے بدلیانی نپ گوں دنیا ءِ مزنیں تاگتاں بندوک انت۔ اے گپ یک گواچنے کہ سی پیک ءِ Completion پہ انڈیا ءُ امریکہ ءَ یک مزنے تاوانے، اگاں سی پیک ءِ پروجکٹ سرجم بہ بیت اشی ءِ ساپیں مانا ایش انت کہ چین پاکستان ءَ گوں ھوار انڈیا ءِ گیرا ءَ تنگ کنت۔ روس وا پیسرا امریکہ ءِ ھلاپ ءَ چین ءِ ہمرا دار انت، بزاں سی پیک ءِ Completion اے خطہ ءِ تہا روس ءِ ھم مھکمی انت ءُ ھمے زوتاں روس ءُ پاکستان ءِ فوجی مشق اشی ءِ ساپیں مثال انت۔ اے خطہ ءِ تہا روس ءِ زورا زور بوؤگ امریکہ ءِ راجی نپاں تاوان بار کنت۔ نو اے گپ پدر انت کہ سی پیک ءِ دارگ ءِ ھاترا امریکہ ءُ انڈیا ءِ چم بلوچ جنز ءَ سک انت ۔ بلے جست پدا ھما انت، آیا بلوچ راجی جنز وتی راجی نپانی ھاترا امریکہ ءُ انڈیا ءِ نپاں پیلو کنگ ءِ واک ءَ داریت یا نہ؟ اے ردا بلوچ راہشون ءَ جیڑگی انت۔ زوت وتی اندری ہڑ ءُ جنجالانی توجیلے درگیجگی انت، وت ءَ یک مھکمیں جنزے ءِ دروشم ءَ دنیا ءِ دیما سھرا کنگی انت، تاکہ اے خطہ ءِ تہا آؤکیں جاورھالانی تہا بلوچ راج وتی راجی نپاں پھازاِت کُت بہ کنت۔

Share on
Previous article

چرا معافیت بندر چَهبار (چابهار) از تحریم های بین المللی به ضرر ملت بلوچ

NEXT article

گرامی باد خاطرهٔ قربانیان مذاکره با حکام مرکزی ایران

LEAVE A REPLY

MUST READ

جنگ عرب و عجم – محمــد کـريــم بلـــوچ

جنگ عرب و عجم – محمــد کـريــم بلـــوچ

شھید شفی جان بلوچ

شھید شفی جان بلوچ

بلوچستــــان گلزميـــن اجـــدادی ماســـت

بلوچستــــان گلزميـــن اجـــدادی ماســـت

پاکستانی خطرات کو روکنے کے لیے تمام متاثرہ اقوام و ممالک کو مشترکہ طور پر پاکستان کا مقابلہ کرنا ہوگا ۔ حیربیار مری

پاکستانی خطرات کو روکنے کے لیے تمام متاثرہ اقوام و ممالک کو مشترکہ طور پر پاکستان کا مقابلہ کرنا ہوگا ۔ حیربیار مری

Truck hits marchers of Long March, two injured

Truck hits marchers of Long March, two injured

حادثے میں لانگ مارچ میں شریک دو افراد زخمی

حادثے میں لانگ مارچ میں شریک دو افراد زخمی

بلوچستان اِشغالی در چنگال خونینِ غارتگران – قسمت پنجم

بلوچستان اِشغالی در چنگال خونینِ غارتگران – قسمت پنجم

پاکستانی عدالت ءُ حکومتءَ بلوچ قومءَ هچ دابیں انصاف نہ رسیت – جمیل بگٹی

پاکستانی عدالت ءُ حکومتءَ بلوچ قومءَ هچ دابیں انصاف نہ رسیت – جمیل بگٹی

شهید حیات بیوسءِ شعرے آئی وتی توارءَ

شهید حیات بیوسءِ شعرے آئی وتی توارءَ

ماہِ اپریل میں آپریشن دوران 120 سے زائد افراد لاپتہ، 24قتل کئے گئے، بی بی گل بلوچ

ماہِ اپریل میں آپریشن دوران 120 سے زائد افراد لاپتہ، 24قتل کئے گئے، بی بی گل بلوچ

بر دانش آموزان بلـوچ چه می گـذرد؟ بخش آخـر

بر دانش آموزان بلـوچ چه می گـذرد؟ بخش آخـر

پنجگور کے علاقے تپس ہائی اسکول کے قریب سے فورسز نے اکرم ولداسمائیل کو اِن کے گھر کے سامنے سے اغوا کرلیا

پنجگور کے علاقے تپس ہائی اسکول کے قریب سے فورسز نے اکرم ولداسمائیل کو اِن کے گھر کے سامنے سے اغوا کرلیا

اقوام متحده کی انسانی حقوق کونسل کے 33 ویں اجلاس میں بهارت کا بلوچستان میں انسانی حقوق کی پائیمالی پر پاکستان کو ذمه دار پر بی جے پی کے ترجمان انیل بالونی سے گفتگو

اقوام متحده کی انسانی حقوق کونسل کے 33 ویں اجلاس میں بهارت کا بلوچستان میں انسانی حقوق کی پائیمالی پر پاکستان کو ذمه دار پر بی جے پی کے ترجمان انیل بالونی سے گفتگو

انڈیا سے بی جی پی کے ترجمان انیل بالونی صاحب سے گفتگو – ریڈیو حال

انڈیا سے بی جی پی کے ترجمان انیل بالونی صاحب سے گفتگو – ریڈیو حال

نواب اکبرخانِءِ سالروچءِ درگتءَ تران

نواب اکبرخانِءِ سالروچءِ درگتءَ تران