بلوچ گلزمین ءِ جارچین
وش آتکے
|
|
|
بلوچ گلزمین ءِ جارچین |
|
وش آتکے |
|
| |
| | گوانک ٹیوب | | | لبزانک | | | نبشتانک | | | سرتاک |
| |
|
دوشمبے 2007/12/31 بلوچستان: سال دوھزار ءِ ھفت ءِ نپ ءُ تاوان میار ریکانی
بلوچستان ءِ مھلوک ءَ دو ھزار ھفت ءِ سال ھم چو دوھزار شش ءَ گران کپتگ۔ بلے دوھزار ھفت ءَ بلوچ راجی وت واجہی ءِ جہد ءَ لہتے انچیں نپ ھم کٹ اِتگ کہ آ چد ءُ ساری چہ بلوچ ءِ تہلہ ءُ بھت ءَ چھ پھک ءَ دور بوتگ انت۔ دو ھزار شش ءِ وڑا دوھزار ھفت ءَ ھم بلوچستان ءَ پاکستانی فوج ءِ آپریشن ءُ بلوچ کشی شپ ءُ روچ برجاہ بوتگ۔ دومی نیمگ ءَ رو ایرشتی بلوچستان ءَ ایرانی زوراکیں گجر ءَ ھم چو پاکستان ءِ پنجابی فوج ءَ وتی لگت بلوچ ءِ گٹ ءَ برجاہ داشتگ، دو درزن ءَ گیش بلوچ ورناہ کرین ءَ ٹنگ اتگ ءُ پاھو داتگ ءُ پنجاہ ءَ گیش تیر آماچ کتگ ءُ شہید کتگ ءُ دو سدا گیش بلوچ بلوچ بووگ ءِ گناہ ءَ دستگیر کتگ۔ رودراتکی بلوچستان ءَ پنجابی فوج ءَ کاھان کوھلو، ڈیرہ بگٹی، بولان، نوشکی، کلات، مشکے، خاران، پنجگور، تمپ، مند، کیچ، دشت، گوادر، حب، نصیرآباد، جعفرآباد، وڈ، سبی، بارکھان ءُ ایدگہ دمگاں گوں گن شپ ھیلی کواپٹرءُ جنگی گرابانی کمک بمب ءُ تیر گواری ءَ برجاہ داشتگ۔ اے بمب گواری ءُ تیر گواری ءَ چھ یک درزنی ءَ گیش چوریگ ءُ زالبوالانی ھواری ءَ دو درزن ءَ گیش بلوچ شھید کتگ انت۔ دو ھزار شش ءِ وڑا دوھزار ھفت ءِ سال ءَ ھم بلوچ راج ءَ چھ ءِ بلوچ مستریں راجی راہ دربر پل اتگ۔ دوھزار شش ءَ نواب اکبر خان بگٹی شہید بوتگ ءُ دو ھزار ھفت ءَ مستریں بلوچ گوریلا لیڈر نوابزادہ بالاچ مری چہ بلوچاں سست کہ آ بیست نومبر ءَ نوشکی ءِ دمگ ءَ سرلٹھ ءِ کوہ ءَ پنجابی فوج ءَ گوں یک دیم پہ دیمی جنگے ءِ درگت ءَ گوں دو ھمراھاں شہید بوت۔ دوھزار ھفت ءَ نوابزادہ بالاچ مری ءَ پیسر ھشت اگست ءَ ڈاکٹر خالد گوں دلجان بلوچ ءَ مند ءَ گوں پنجابی فوج ءَ یک دیم پہ دیمی جنگے ءِ درگت ءَ شہید بوت۔ ڈاکٹر خالد ءُ دلجان ءِ شہادت ءَ ساری مارچ ءِ ماہ ءَ پاکستانی فوج ءَ گوں پازدہ ھیلی کواپٹرانی کمک ءَ مند ءَ ارش کت ءُ آئی ءِ برات ءُ بلوچ راجی جہدکار واحد قمبر گوں درزنی ءَ گیش دگہ بلوچاں دستگیر کت ءُ روچے مرچی تک آ گوں وتی ھمراھاں بیگواہ انت۔ سال دوھزار ھفت ءَ پنجابی فوج ءَ بلوچستان ءَ سدا گیش بلوچ دستگیر کتگ ءُ بیگواہ کتگ انت۔ اشانی چھ پنجاہ نپر گیش مردم ڈیرہ بگٹی ، کوھلو ءُ کاھان ءِ مردم انت۔ دوھزار ھفت ءَ پاکستانی جنگی گراباں کوھلو کاھان ءُ ڈیرہ بگٹی ءَ بازیں دمگاں بلوچانی گدانی سرا بمب گواری کتگ ءُ بلوچانی گس ءُ گدان تباہ کتگ ءُ دوزنی ءَ گیش بلوچ زالبول ءُ چوریگ شہید کت انت۔ دومی نیمگ ءَ بلوچ سرمچاراں وتی ارشانی تہا ھم باز گشادی آؤرتگ ءُ ڈیرہ بگٹی، کوھلو، کاھان، کوھستان مری، کوئٹہ، بولان، نوشکی، پنجگور، خضدار، حب، مستونگ، گوادر دشت، مند ءُ ایدگہ دمگاں سدا گیش ریگولر پنجابی آرمی، ایف سی ءُ پولیس نپر گوں دورزنی ءَ گیش آفیسراں، تیر ءُ بمبانی آماچ کتگ ءُ کشتگ انت۔ اے ارشاں گوں یک درزنی ءَ گیش فوجی گاڑی ھم تباہ بوتگ انت۔ دوھزار ھفت ءَ ڈیرہ بگٹی، کوئٹہ ءُ ایدگہ دمگاں بلوچ سرمچاراں یک درزنی ءَ گیش پنجابی فوج ءِ مخبر ھم کشتگ انت۔ دو ھزار ھفت ءَ ڈیرہ بگٹی ءُ حب ءَ پنجاہ برا گیش گیس لائن گوں بمباں تباہ کنگ بوتگ انت۔ کوھلو، بارکہان، جعفرآباد، مستونگ ءُ ایدگہ دمگاں سد برا گیش الیکٹرک ءِ ٹاور گوں بمباں تباہ کنگ بوتگ انت۔ دو ھزار ھفت ءَ کوئٹہ ءُ حب ءَ سھ وت کشیں بمب ارش بوتگ انت۔ حب ءَ سی ءُ سھ ءُ کوئٹہ ءَ سی ءُ یک مردم بیران بوتگ۔ اے بیرانیں مردمانی تہا ھفت وکیل ءُ یک جج ئے ھم گون انت گوں۔ اے ھر سھیں ارشانی ذمہ واری کس ءَ نہ زرتگ۔ نوابزادہ بالاچ مری ءِ شہادت ءَ رند بلوچ جہدکاراں یک تاوانے اے ھم بوتگ کہ پہ بلوچاں توار چست کنوکیں بلوچ جہدکار میر ھیر بیار مری ءُ فیض بلوچ دھشتگردی ءِ بھتام ءَ لندن ءَ دستگیر کنگ بوتگ انت۔ دو ھزار ھفت ءَ اگاں یک نیمگے پاکستانی ھاکماں بلوچستان لگتمال کتگ گڈا دومی نیمگ ءَ قدرت ءِ دست ءَ ھم بلوچ باز لاچار بوتگ۔ اولی برا ھما وھدا وھدئے زرباری بلوچستان ءَ زری ایروپاں اورمارہ، پسنی، سُر ،گوادر ءُ جیوانی ءُ روایرشتی بلوچستان ءَ پسابندن، چاھبار ءُ کنکرک ءَ سدانی ھساب ءَ لوگ ءُ گس زری گورماں تباہ کتگ ءُ یدار ءُ بوجیگ پروشتگ انت ءُ اے زری ایروپاں کساس بیست مردم بیران بوتگ ءُ ھزارانی ھساب ءَ بے گس بوتگ انت۔ زرباری بلوچستان ءَ زری ایروپاں چھ رند، کیچ، آواران، خضدار، مشکے ءُ بازیں دگہ دمگاں ھور ءُ ھاراں چھ لکھ ءَ گیش مردمانی گس تباہ بوتگ ءُ آواران ءُ خضدار ءِ دمگاں سھ سدا گیش مردم بیران بوتگ۔ تربت ءَ میرانی ڈیم ءَ تباہی کتگ ءُ بازیں میتگ ءُ بازار ھار آماچ بوتگ ءُ تباہ بوتگ انت۔ ءُ ھزارانی مردمانی زند ءُ نند انگت ءَ ھم باز نگیگ انت۔ دو ھزار ھفت ءَ بلوچ سرمچار ءُ جہدکاراں یک مزنیں سیتے اے ھم رستگ کہ پاکستانی ھاکمانی گوادر ءَ پنجابی ءُ مہاجرانی آباد کاری ءِ پروگرام پھک ءَ تاوان بوتگ انت ءُ پنجابی ءُ مہاجر اں بلوچستان ءِ جاور ءُ بلوچ سرمچارانی ترس ءَ بلوچستان ءِ نیمگ ءَ کنزگ ءَ گندگ ءَ یلہ داتگ ءُ کوئٹہ ، حب ءَ آبادیں کواھنیں آبادکاراں چھ ھم بازیناں بلوچستان یلہ داتگ۔ |
|||||
