بلوچ گلزمین ءِ جارچین

 وش آتکے

|

 Download Balochi Font and view Balochi text uniquely 

|

مہلب پہ وتی پتءِ ءُ  فرزانہ پہ وتی براتء 
طارق رحیم بلوچ

ہرکس وتی زندءِ وش ءُ پُرواہگ ایں روچانی گوازینگا زندءِ امیتانی  مارشتانی مدام ریس ءُ پرریسئَ وڑے نہ وڑےءَ وتی ھیالانی چادرءَ بازیں واھگ مانپوشیت روچاں ہفتگ ،ہفتگاں ماہ ءُ ماہاں سالءُ کرنانی سفرءَ راہی بیت ۔ہمے زندءِ پُر تابیں روچانی دیمے برگءَ بازیں امیت ءُ واھگ نیم راہ ءَ گٹ گیر کنگ بنت ۔پمشکہ مردم وتی زندءِ  ھما امیتءُ واھگانی راہ ءَ دگہ دابے گوازینگءَ لاچارءُ مجبور بیت ۔ہمے وڑا بلوچ سرڈگارءِ بازیں گران مہذبیں ماتانی زھگ ھم وتی دوستگیں ھما ہستی آنی شوھازگ ءُ پد جنگ ءَ وتی زندءِ درائیں امیت ءُ واھگانی قربان کنگءَ ھما لاڑیں جنکاں وتی چادرءُ سریگ مانپوشتگاں وتی برات، پت،کس ءُازیزانی گارءُ بیگواہ بوھگءِ درد ءُ رنجانی باروتی کوپگاں بستگ انت سالانی سال کیمپ ءُ فٹپاتانی سرا وتی زندگیئِ روچاں گوازینگا انت۔
اے گران ءُ مشکلیں زندے مسافتءَ بانک فرزانہ مجید ءَ وتی زندے درائیں امیت ءُ واھگ گشتگ انت پہ وتی برات کامریڈ ذاکر مجیدءِ  سلامت ءُ زندگ بوھگے ھاترا , ذاکر مجید  وتی ماتءِ مستریں بچک انت ۔لسبیلہ یونیورسٹیئَ نودربر ے ۔قومئِ دردءَ سرپد ،وتی سرڈگارئِ غلامیءَ نہ منگ سیاست کت ۔ بی ایس او آزاد ءِ سنئر وائس چیر مین انت ۔مستونگءَ سنگتے ءِ ھمراھیئَءَ آوارجنگ بوتگ ,انگت بیگواہ انت ۔ کس نزانت کجا انت ہر بلوچءِ آئیءِ زندگ بوھگے دعا ئے کنت ۔بانک فرازانہ مجید ءَ کامریڈ ذاکر مجیدءِ آوار جنگ ءُ بیگواہیئِ چیزے روچءَ پد وتی لوگ، وانگ ،زندئِ ایدگہ وشیءُ آسراتی ویل کتگ انت ۔ براتءِ درگیجگءِ جہدءَ دزگلائشت انت ۔وتی بے وسیءُ لاچاریءِ ذکر، وتی براتءِغم ءُ رنج ،وتی ماتئِ زہیر ءُ ترانگ ءُ وتی سیاد ءُ ازیزانی دوریءُ گستائیءِ ددراِ ں ابید پہ وتی ماتءِ دست پچ ءُ تین موشیں پتکگیں نانانی کدی کسہاں نہ کنت بلکیں وتی ورناھیں براتئِ راجی جہد ءِ توارءَ دیم برگءِ تبلیغ ءَ کنت وتی ورناھیں براتے ھمراھان, گار ءُ بیگواھیں بلوچ ورنا ءُ پیرینانی بازیابی ءُ ٹپی ءُ ٹوری ایں کپتگیں لاشانی سرجمی یک گینءَ ذکرءَ کنت۔ اے ریاستئَ گوں ھچ گلگدار نہ انت ۔بلے وتی ھم زبا نیں بلوچ سیاسی لیڈرانی گلگ ءَ کنت ۔آھاں اسلام آبادءِ ماڑیانی تہا نشتگیں بلوچ راجدر بر راجئِ سودا جنگا انت ۔وتی لاپ ءَ بس پُر کن انت ۔آھانی دلءَاے امیت انگت زندگ  انت بلوچ ریاستی غیر انسانی زوراکيءَ چا پد وتی آزاتيءِ بیرکءَ زمینءَ ائیر کن انت پدا گون ھمایانی رمءَ ھمراہ آیانی بلوچ راجءِ سودا جنّکءَ آیانی دستان مضبوط کن انت، اے .پا ھما روچ اوپار انت کہ بلوچ ورنا پاک سرزمین شاد بادءَ بوان انت، پمیشکا اے گون ھما زورکان ھواريءَ گون آیانی چاپءَ ھمتوارانت

کیمپ ءِ دیم ءَ بازیں عکسانی پشت ءَ ماما عبدالقدیرءِ کشءَ نشتگیں بانک فرزانہ مجید ءِ مدام چم وادریگ انت کہ کدی ٹی وی چینل ءُ روتاکانی ھالکار مئے نند گے سبب ءَ جست کناں ۔آ مدام ٹی وی کیمرہ ءُ رسانک در ءَ دیمئَ ہر جستانی پسو ءَ ابید ترس ءُ لرز ءَ وتی دلئِ سرجمیں کہتاں گشان کنت بلے کدی ھم ارسئِ در نیاانت پرچاکہ اے زلم ءُ زوراکی ءِ سیاھیں روچاں آئیءِ دل مھکم ءُ آئیءِ لیکہ مضبوط کتگ۔
مہلب عمر سک کسان انت ۔اسکولئَ وانگ ءُ  لیب ءِ روچئِ انگت ھلاس نہ بوتگاں ۔ بلے کسان بالادیں مہلب مسسنگ پرسنزکپمپءِ تہا سک دیر انت نندگءَ گندگ بیت ۔سرجمیں روچ ھچ نہ وارت ۔پرچاکہ مہلبءِ پت ڈاکٹر دین محمد بلوچ آوار جنگ بوتگ بیگواہ انت ۔ پمیشکہ مہلب پہ وتی پتئِ شوھازءَ برے کوئٹہ برے کراچی ءُ مرچاں اسلام آبادءِ کیمپءَ نندوک انت ۔ھمک ھالکارےءِ اردو زبان ءَ گپ جنت وتی بزّگی ءُ بے وسیئِ کسہاں کاریت۔ پاکستان ءَ مردہ باد گشیت ۔ایجنسی والہاں ذاہ ءُ بد دنت۔ ایف سیءُ فوج ئِ کار ءُ کرد مہلب کرا زلم ءُ زوراکی انت ۔پاکستان ئِ دراھیں ادارگاں چہ مایوس انت پمشکہ وتی پتئِ بازیابیءَ اپیل ءَ میان استمانی بنی آدمی حقانی ادارگاں کنت ۔ آزاد بلوچستان ئِ بیرکءَ ٹیٹو(نقش) ءَ وتی گُل سرا جتگ ۔ برے برے ھالکارانی دیم ءَ وتارا وت سوچگے جارءَ جنت۔ بلے اے زھگے پریاتاں کس گوشدارگءَ ساڑی نہ انت ۔مہلب اے شد لاپی کیمپ ءَ درستاں چہ کستریں جہد کار انت کہ وتی پت ڈاکٹر دین محمد ئِ بازیابیءَ ھمک روچ ودار ءَ انت۔
لہتیں روچ انت کہ اے شد لاپی کیمپ پاکستانءِ بنجاہ ھاکمانی شہر اسلام آبادءِ سبز ءُ ملگزاریں نیشنل پریس کلبءَ ڈنئَ سُپر مارکیٹ ءِ یک کنڈےءَ لگوک اِنت ۔ اے کیمپءَ مزنیں کساسے ءَ بلوچ آوار جتگیں بیگواھیں مردماں ابید شھید بوتگیں ورناھانی عکس ھم جنوک انت۔ کیمپ ءَ نشتگیں بلوچ مسسنگ پرنسز ئِ اتکگیں ٹولی ءَ ابید اسلام آبادئِ بلوچ نودربرءُ سول سوسائٹیئِ دیمروئی پسندیں چندیں مردم اے کیمپءَ زیارتئَ کائینت ۔ بلے منا اسلام آباد ءِ جاہ منند یں بلوچ فیمیلی ءُ نودربرانی تہا چوشیں ھب ءُ واھگے گندگا نئیت کہ اسلام آبادءِ بلوچ کلچرءِ نام ءَ وھدے مزنیں مچی ءُ میڑھانی تہا آ کساسءَ وتی ھوار بوھگ ءُ یکوئی درشان کنگا گندگ, بوت کنت که ايشانی دلءُ لاپان اسلام آبادءِ حاکمان ترسے ودی کتگ که شما هم بيگواه کنگ بئيت۔ بس لہتیں نودربر انت کہ اے بیگواھیں مردمانی اتکگیں کہولانی غم ءُ اندوھاں گوں یکوئی درشان کنگا گندگ بنت ۔۔۔۔
بانک فرزانہ ءُ مھلب یکیں کاروانءِ دو مساپر انت ۔ دوئیں یک پجیگءَ کیمپءَ سر بنت ۔دوئیں ھمک روچ ابید سبارگئَ واتر بنت ۔دوئیں بلوچ انت ۔دوئیناں وتی چاگردی زندے وشی ءُ آسراتی کبر کتگ انت۔ بس فرق ایش انت کہ مھلب پہ وتی پت ڈاکٹر دین محمد ءُ فرزانہ وتی برات ذاکر مجید ءِ شوھازء ِجہدءَ وتی زندے روچاں گوازینگا اَنت۔