بلوچ گلزمین ءِ جارچین
وش آتکے
|
|
|
بلوچ گلزمین ءِ جارچین |
|
وش آتکے |
|
| |
| | گوانک ٹیوب | | | لبزانک | | | نبشتانک | | | سرتاک |
| |
!ٹوٹ بٹوٹ کی کھیر
ٹوٹ بٹوٹ کی کھیر !اگلے پنج سالہ منصوبے میں مشرقی پاکستان کے ترقیاتی بجٹ میں چالیس فیصد اضافہ کیا جا رہا ہے ! اس سال بلوچستان کا ترقیاتی بجٹ دگنا کردیا گیا ہے ! سول سروس میں مشرقی پاکستان کے ملازمتی کوٹے پر عمل درآمد یقینی بنایا جائےگا ! سول سروس میں بلوچستان کا کوٹہ تین گنا کیا جا رہا ہے ! مشرقی پاکستان کے عوام کی اکثریت محبِ وطن ہے ! بلوچستان کے عوام کی اکثریت محبِ وطن ہے ! یہ تاثر غلط ہے کہ مشرقی پاکستان کے وسائل کی آمدنی مغربی پاکستان پر خرچ کی جارہی ہے ! یہ تاثر درست نہیں ہے کہ بلوچستان کے قدرتی وسائل کی نوے فیصد آمدنی وفاق اور دیگر صوبوں پر خرچ کی جارہی ہے ! حکومت مشرقی پاکستان کو اقتصادی لحاظ سے مغربی پاکستان کے برابر لانے کی بھرپور کوششیں کر رہی ہے ! حکومت بلوچستان کو ترقیاتی لحاظ سے دیگر صوبوں کے ہم پلہ کرنے میں مخلص ہے ! مشرقی پاکستان کے انفراسٹرکچر کو جتنی ترقی گذشتہ پچیس سال میں ملی اتنی پچھلے دو سو برس میں نہیں ملی ! بلوچستان کے انفراسٹرکچر کو جتنی ترقی گذشتہ دس برس میں ملی ہے اتنی پچھلے پچاس برس میں نصیب نہیں ہوئی ! کچھ مٹھی بھر عناصر مشرقی پاکستان میں ملک دشمن پروپیگنڈہ کر رہے ہیں۔عوام ان عناصر کو بے نقاب کریں ! کچھ مٹھی بھر ملک دشمن عناصر غیرملکی طاقتوں کے اشارے پر بلوچوں کو برگشتہ کررہے ہیں۔عوام ایسے شرپسندوں سے ہوشیار رہیں ! عوامی لیگ کی قیادت بھارت کے ہاتھ میں کھیل رہی ہے ! بلوچستان کے کچھ نام نہاد قوم پرست سردار سرحد پار اشاروں پر ناچ رہے ہیں ! حکومت مشرقی پاکستان کے قوم پرستوں سے چھ نکات پر بات کرسکتی ہے لیکن علیحدگی پسندی کو آہنی ہاتھ سے کچل دیا جائے گا ! حکومت بلوچستان کی قوم پرست سیاسی قیادت کے ساتھ کھلے دل سے مذاکرات پر آمادہ ہے۔لیکن مسلح علیحدگی پسندوں سے کوئی بات نہیں ہوسکتی ! حکومت غیر بنگالی آبادی کا تحفظ کرے گی ! حکومت غیر بلوچ شہریوں کی ہلاکتوں کا سختی سے نوٹس لے گی ! فوجی آپریشن کے بعد اب مشرقی پاکستان کے حالات تیزی سے معمول پر آرہے ہیں ! عسکری آپریشن کے بعد اب بلوچستان کے حالات تیزی سے بحال ہو رہے ہیں ! مکتی باہنی کو مغربی بنگال کے کیمپوں میں دہشت گردی کی تربیت دی جا رہی ہے ! بھارت بلوچ علیحدگی پسندوں کو افغانستان میں دہشت گردی کی تربیت دے رہا ہے ! مشرقی پاکستان کے معاملے کو فوجی آپریشن کے بعد اب سیاسی طور پر حل کیا جارہا ہے۔عوام جلد خوشخبری سنیں گے ! بلوچستان کے ساتھ ہونے والی زیادتیوں کا ہمیں احساس ہے۔عوام جلد خوشخبری سنیں گے !!!! اگر یہ بات درست ہے کہ مشرقی پاکستان میں حالات محض بھارتی مداخلت کے سبب خراب ہوئے۔اگر یہ بات درست ہے کہ کشمیر میں حالات محض پاکستانی مداخلت کا شاخسانہ ہیں تو پھر یہ بھی درست ہے کہ اس ناطے بھارت اور پاکستان کا تیسرا مشترکہ منصوبہ بلوچستان ہے ۔ صوفی تبسم کی ٹوٹ بٹوٹ نظم ہم بچے سکول میں اس وقت مزے لے لے کر پڑھتے تھے جب مشرقی پاکستان میں آگ نہیں جلی تھی ۔ خالہ اس کی لکڑی لائی پھوپھی لائی دیا سلائی امی جان نے آگ جلائی ٹوٹ بٹوٹ نے کھیر پکائی ! آج کا بلوچستان بھی مجھے صوفی تبسم کا ٹوٹ بٹوٹ لگ رہا ہے ۔ |
