تیونسءِ زوراکین صدر زین العابدین بن علیءِ حکومتَ پروش وارت

Friday, January 14, 2011

تیونسءِ زوراکین صدر زین العابدین بن علیءِ حکومتَءَ پروش وارت

حال انت کہ صدر زین العابدین بن علیءَ تیونس ھلاس کتءُ شت
تیونس/ سویڈش حالتاک آفتون بلادتءِ جہگیرءَ حال کت که تیونسءِ صدر زین العابدین بن علیءَ ملک ھلاس کت۔ پرچہ بازین روچ انت کہ تیونسءِ مھلوک حکومتی زوراکیان، بیروزگاریءُ ناانصافیانی خلافءَ مظاھرہ ءُ ھڑتال کت۔ تیونسءِ کلّین شھرءُ دمگان مردمان وتی نارضائی تھروز کت۔ گیش چا شصت مردم حکومتی واکانی تیرگواریءَ کشگ بوت انت۔ زیکین روچءَ  صدر زین العابدین بن علیءَ تیونسءِ ٹی ویءِ دیما گپ کت کہ ملکءَ من زوت گون گچینکاریان جمھوری حکومتءِ برجاہ داران ۔ تمام زورکیانی جست ءُ پرسان کنانءُ ملکءَ سی ھزار ورناھان روزگار دیگ بنت.  تیونس صدر زین العابدین بن علیءَ بیست و چھار سال انت ملکءَ بے مردمی گچینءَ حکومت کنگءَ انت۔ تیونس مزین شھران کرفیو یعنی روگ آیگ پابندی جنگ بوتگ، فوجءَ بالی پٹ  وتی دستءَ گپتگ انت۔ تیونسءِ مھلوک گون وتی تھروزیءَ صدر زین العابدین بن علیءِ گپان نا منّت انتءُ وتی مظاھرہ حکومت خلاف برجاہ داشتءُ صدر زین العابدین بن علیءِ استعفیءِ لوٹ اش کت۔ مروچی حال انت کہ صدر زین العابدین بن علیءَ تیونس ھلاس کتءُ دیم پا سعودیءَ رفت۔ انون تیونسءِ میان استمانی بالی پٹ فوجءَ دست گپتگ ءُ بالیگانی بال کنگءُ ندّگ بند کنگ بوتگ۔ تیونس سروزیرءَ ھداروکین صدرءِ اگھدہ دست گپتگ۔ عربی ٹی ویءِ مطابقءَ نوکین ھداروکین حکومتءِ دیما برگ یک شورایءِ مستری گون  شش ذمہ وران ، پارلیمنٹ جارچین ءُ وزیر دفاعءِ مشھورت ٹاھینگ بوتگ۔

Source: Presidenten har lämnat landet