بلوچ گلزمین ءِ جارچین

 وش آتکے

|

 Download Balochi Font and view Balochi text uniquely 

|

 یک شمبے 2007/12/15

 بلوچستان ءِ قوم پرست پارٹیاں پاکستانی گچین کاریانی بائیکاٹ کنگ ءِ جارجتگ

سمندر آسکانی/یلان مری/میران بگٹی/بشام دُرازئی/یارجان زرکزئی

بلوچستان ءِ پاکستان ءِ لگتمالیں بہر ءِ سیاسی پارٹیاں پاکستانی گچین کاری ءُ الیکشناں بہر نہ زورگ ءُ بائیکاٹ کنگ ءِ جار جتگ ءُ گشتگ کہ پاکستانی الیکشن بلوچستان ءِ مھلوک ءِ دردنی درمان نہ ینت۔  اے رد ءَ نیشنل پارٹی ءِ سیکریٹری جنرل میر حاصل خان بزنجو ءَ ریڈیوگوانک گوں سمندرآسکانی ءَ گپ جتگ ءُ گشتگ کہ نیشنل پارٹی ءِ باسکاں ءُ جہدکارانی واھگ بوتگ کہ نیشنل پارٹی الیکشناں بہر بزُور ایت بلے نیشنل پارٹی ءَ آل پاکستان ڈیموکریٹک موومنٹ ءِ ھواری نیشنل پارٹی ءَ بلوچستان ءَ انوگیں جاورانی برجاھی ءَ  الیکشنانی بائیکاٹ ءِ فیصلہ کتگ ۔ آئی ءَ گشت کہ نیشنل پارٹی ءِ سینئر نائب صدر سردار ثنا اللہ زھری ءُ ایوب جتک ءِ ھمراہی ءَ پارٹی ءِ لہتے راہ دربراں الیکشناں بہر زورگ ءِ جار جتگ۔ بلے آئی ءَ اے گپ نہ زاھر نہ کت کہ نیشنل پارٹی ءَ  پارٹی ءِ فیصلہانی نہ منوکیں اے راہ دربرانی بابت چھ شور  کتگ۔

نیشنل پارٹی الیکشناں بہر زورگ ءُ بائیکاٹ جنجالاں گوں اے وہد ءَ تہی جنجالانی آماچ انت۔ یک نیمگ ءِ سردار ثنااللہ زھری ءَ نیشنل پارٹی پارلمنٹرین نام ءَ الیکشناں بہر زورگ ءِ جار جتگ ءُ دومی نیمگ ءَ پنجگور ءَ  نورآحمد ءَ  گوں وتی سنگتاں اے گشتگ کہ نیشنل پارٹی اے پی ڈی ایم ءِ واھگانی پدا بائیکاٹ ءَ شتگ بائد اِش ات کہ نیشنل پارٹی ءَ بلوچستان ءِ جاوران ءَ  بنیاد ءَ فیصلہ کتیں۔

میر حاصل خان ءُ ڈاکٹر جہانزیب جمالدینی ءِ گپ تران اش بکن

مکران ءَ  سرزاھر ءَ نیشنل پارٹی ءِ امیدواراں وتی  کاگد کَشتگ انت بلے گوادر ءَ چھ ھود ءِ صحافیانی گشگ انت کہ رؤف کلمتی ءَ وتی کاگد نہ کشتگ انت ءُ آ الیکشن ءَ اوشتوک انت۔ گوادر ءَ  کہ نیشنل پارٹی ءِ سرا پیسرا چھ یک بھتام ھست کہ آ گوں مسلم لیگ ءَ اتحاد انت ءُ نیشنل پارٹی ءِ راہ دربراں گوادر ءَ چھ کروڑانی کلدار فائدگ چست کتگ ھودا آ پدا گوں ھکومت ءَ ھمکار انت۔ رؤف کلمتی کہ نیشنل پارٹی باسک ئے  اے وھد ءَ  آئی ءَ  نیشنل پارٹی، بی این پی عوامی ءُ مسلم لیگ ءِ پجیگ ءَ کمک گون انت۔

بلوچستان نیشنل پارٹی ءِ قائم مقام صدر ڈاکٹر جھانزیب جمالدینی ءَ گوں ریڈیو گوانک ءَ گپ جت ءُ گشت کہ بلوچستان ءِ انوگیں جاور بی این پی ءَ چاراتگ انت ءُ الیکشناں بھر نہ زورگ شور کتگ ڈاکٹر جہانزیب جمالدینی ءَ گشت کہ بلوچستان ءَ ھزارانی جہد کار ھکومت ءَ بیگواہ ءُ بندیگ کتگ انت نواب بگٹی ءُ بالاچ مری شہید کتگ، سردار اختر مینگل جیل ءَ بندیگ انت۔ چشیں جاورانی برجاھی ءَ الیکشن ءَ روگ ءَ غیر دانشمندانہ شورئے بوت کنت

نیشنل پارٹی ءُ بلوچستان نیشنل پارٹی ءِ الیکشنانی بائیکاٹ ءَ ساری جمھوری وطن پارٹی ءِ ھر دویں بہراں،  بی این ایم،  بلوچستان ءَ سلاہ بندیں جہدءَ گوں گلائیش گل بلوچستان لبریشن آرمی، بلوچ ریپبلکن آرمی ءُ بلوچستان لبریشن فرنٹ اے الیکشناں بہر نہ زورگ ءِ جار جتگ۔

دومی نیمگ ءَ بلوچستان ءِ پشتون آبادی ءِ بہر ءَ محمود خان اچکزئی ءِ پارٹی پختونحواہ ملی عوامی پارٹی ءَ ھم اے الیکشناں بہر نہ زورگ ءِ جار پرینتگ۔