بلوچ گلزمین ءِ جارچین

 وش آتکے

|

 Download Balochi Font and view Balochi text uniquely 

|

  پشمبے 2007/12/27

بے نظیر بھٹو قتل

دوستین رند

پاکستان پیپلز پارٹی ءِ چیرمین ءُ پاکستان ءِ گوستگیں سروزیر بے نظیر بھٹو راولپنڈی ءَ قتل بوت۔ پاکستانی ءُ ڈنی نیوز ایجنسیانی گشگ انت کہ بے نظیر بھٹوپنجاب ءَ راولپنڈی ءَ  لیاقت باغ جلسہ ءَ رند وھد دیم پہ گس ءَ راوگ ءَ دراتکگ یک ورائیں مردین آدمی ءَ آئی ءِ سر فائر کتگ دو تیر بے نظیر بھٹو ءِ سر ءُ گردن ءَ لگ اتگ ۔ تیر گواری رند ارشی ورناہ ءَ وتی جان ءَ بستگیں بمب ئے ترکیتگ ءُ آ وت گوں دگہ بیست ءُ دو مردم مرتگ ءُ کساس پنجاہ مردم  ٹپیگ بوتگ۔

ھودا راولپنڈی جنرل ھسپتال ءِ ڈاکٹرانی گشگ انت کہ بے نظیر بھٹو چہ ھسپتال ءَ سربووگ ءَ ساری بیران بوتگ۔ ءُ آئی ءِ بیرانی سر ءَ لگ اتگیں تیر ءَ چھ بوتگ۔

بے نظیر بھٹو ءِ قتل ءَ رند پاکستان مسلم لیگ نواز گروپ ءَ پاکستانی الیکشنانی بائیکاٹ ءِ جار پرینتگ ءُ گشتگ کہ بے نظیر بھٹو ءِ قتل ءَ رند پاکستان ءَ پاک ءُ پلگاریں الیکشن ءِ گنجائش پش نہ کپتگ۔ بلوچستان ءِ قوم پرستاں گوں پشتون قوم پرست راہ دربر محمود خان اچکزی ءَ اے لیکشنانی پیسرا چھ بائیکاٹ ءِ جار جتگ۔ محمود خان اچکزئی ءَ گوں بلوچ قوم پرستاں مرچی اے جار ھم پرینتگ کہ بے نظیر بھٹو ءِ پرس ءِ ھاترا آدینگ ءَ ھڑتال بیت۔

دومی نیمگ ءَ راولپنڈی ءَ چھ اے ھال ھم ھست کہ پاکستانی فوج ءَ ارش ءِ جاہ شُشتگ ءُ ساپ کتگ ءُ کلیں ثبوت گار کتگ انت۔ ثبوتانی گار کنگ ءَ رند مردمانی گشگ انت کہ نوں اے گپ پھک ءَ پدر بوتگ کہ اے ارش وت جنرل مشرف ءُ آئی ءِ فوج ءَ کتگ۔ ءُ بے نظیر ءِ قتل ءِ ثبوتانی گار کنگ ءِ مانا ھمیش انت کہ اے گپ کدی زاھر بوت مہ کنت کہ بے نظیر بھٹو کیا کشتگ۔

یک درملکی نیوز ایجنسی ءِ گشگ انت کہ القاعدہ بے نظیر بھٹو ءِ قتل ذمہ واری قبول کتگ ءُ گشتگ کہ آئی ءَ مرچی امریکہ ءَ گوں بے نظیر ءَ قتل ءَ چھ مزنیں تاوانے داتگ۔ بلے پیپلز پارٹی ءِ راہ دربر اے گپ ءَ باور کنگ ءَ تیار نہ ینت۔

بے نظیر بھٹو ءَ امریکہ ءِ کمک گون بوتگ بلے بے نظیر بھٹو ءَ چھ القاعدہ ءَ گیشتر پاکستان ءِ آئی ایس آئی ءُ  فوج ءَ ترس بوتگ۔ ءُ وت بے نظیر بھٹو  ءَ ھم باز بر ءَ اے گپ زاھر کتگ کہ آئی ایس آئی ءُ فوج آئی جھد ءَ چھ وش نہ ینت۔

بے نظیر بھٹو وتی خاندان ءِ چارومی مردم انت کہ آ ھم گندگ ءَ  چو وتی پت، دو براتانی چھ رند پاکستانی آئی ایس آئی ءُ فوج ءِ نشانگ بوتگ۔

بے نظیر بھٹو ءِ قتل ءِ ھال ءَ رند تیوگیں پاکستان ءُ بلوچستان ءَ ھم مھلوک ءَ جلوس ءُ ھڑتال بنا کتگ۔ اے جلوس ھڑتالاں چھ ھال انت کہ انگت ءَ سندھ دہ مردم مرتگ۔ مردمانی سرکاری کارگس ءُ پولیس ءِ چوکیاں ابید سدانی ھساب گاڑی ھم آس مانداشتگ انت۔