بلوچ گلزمین ءِ جارچین

 وش آتکے

|

 Download Balochi Font and view Balochi text uniquely 

|

 پشمبے 2007/12/13

 نیشنل پارٹی الیکشن آماچ ءُ دو بہر ءَ بہر ۔

  یارجان زرکزئی

 نیشنل پارٹی  آیوکیں الیکشن بہر زورگ ءُ بہر نہ زورگ ءِ پدا اڑانی آماچ بوتگ ءُ دو بہر ءَ بہر بوتگ۔ نیشنل پارٹی سینئر نائب صدر  سردار ثنااللہ زھری ءِ سروکی دومی بہر ءَ نیشنل پارٹی پارلمنٹرین ءِ نام ءَ  آیوکیں الیکشناں بہر زورگ ءِ جار جتگ ۔ نیشنل پارٹی پارلمنٹرین ءِ  گونما انگت ءَ ایوب جتگ ءُ واحد بلوچ ءِ پیمیں دو سروکیں راہ دربراں ھم وتی ھواری زاھر کتگ ۔ نیشنل پارٹی ءِ اے نوکیں بہر ءَ پارٹی ءِ دگہ کجام راہ دربرانی ھمراھی ءُ کمکی گون انت اے گپ بگندے لہتے روچانی تہا شری ءَ پدر بہ بیت۔

نیشنل پارٹی ءَ  گوستگیں پنچ سالاں چھ  پاکستانی سرکار ءَ گوں نزیکی ءُ  دگہ بازیں بہتام پارٹی ءَ چھ ڈن ءُ وت پارٹی ءِ تہا پیسرا سرا انت ءُ  اے دوبہر ءَ بہر بووگ ءَ رند ھردویں بہرانی پالیسی پہ بلوچستان ءُ پاکستانی سرکار ءِ بابت چے بیت۔ بازیں سیاسی ندکارانی گشگ انت کہ نیشنل پارٹی ءِ انوگیں اڑی فکری ءُ نظریانی ینت ءُ نیشنل پارٹی وتی  راہ دربرانی گروھی ءُ   ذاتی فائدگانی اڑیاں چھ پروشتگ۔ ءُ اے گپ نیشنل پارٹی ءِ واستہ مدام جنجال ءِ کہ سردار ثنااللہ زھری وتی ہند ءَ دگہ پارلمنٹ ممبراں برداشت نہ کنت۔

دومی نیمگ ءَ نیشنل پارٹی الیکشن نہ منوکیں باسکاں سردار ثناہ اللہ ءُ آئی ئے ھمراھانی سرا بہتام جتگ کہ سردار ثناللہ پاکستانی سرکارءَ پہ بلوچستان وزیر اعلی ھاترا ٹاہینتگ ۔

بلے دومی نیمگ ءَ بلوچستان ءِ سیاست ءِ گیش ءُ گیوار ءَ گوں شری ءَ سرپدیں مردمانی گشگ انت کہ سردار ثنااللہ زھری ءِ طبیعت ءُ مزاج چش نہ انت کہ آ چو جام یوسف پاکستانی ھکومت ءٍ دست چیرءَ کار بکنت۔ اے ندکارانی گشگ انت کہ سردار ثناللہ  زھری  ءِ اے وھدءَ یک مجبوریے کہ آ اگاں الیکشنانی بائکاٹ ءَ بکنت ءُ  وتی ھند ءَ الیکشنانی ناکام کنگ ءِ ھاترا آئی جنگ ءُ دعوی گوں وتی برات ءُ برازتکاں بیت پرے ھاترا آ اے وت ماں وتی جنگ ءَ رککگ ءِ ھاترا الیکشن ءَ روگ ءَ انت۔ اے ندکار ءُ تجزیہ نگارانی اے ھم گشگ انت کہ سردار ثنااللہ زھری ءَ مکران ءَ ابید قلات ءُ کوئٹہ ءَ چھ ھم نیشنل پارٹی ءِ بازیں راہ دربرانی کمک گون انت۔ بلے اے سروکانی یک جھد ءِ انگت ءَ ھمیش انت کہ نیشنل پارٹی ھر دمگ ءَ الیکشن ءَ بہر بزور ایت۔ پرے ھاترا  انگت ءَ آ بے توار انت۔