یعقوب مھرنھادءِ داتگین قربانیان راج دیم پہ تپاکیءَ کشـّتگ۔

ھستیانءِ داتگین قربانی راجان دیم پہ تپاکیءَ بر أنت و تپاکی پہ منزلان رسین أنت۔ ألبت إے ھما وھدی بیت إنت کہ رھشونانءِ توکا رھدربریءِ توان بہ بیت و داتگین قربانیانءِ کشاران رون موش بہ کن أنت، و السءِ نیامءَ پہ إشانءِ بروردان‏ءِ بھر بانکا تکانسر بہ بنت۔

ھنچوناھیءَ ھچ ٹولی، گل یا تنظیمءَ إے حق دیگ روا نہ  إنت کہ آئی پہ وتی برنامھانءِ پیش برگا وتی باسکان ندر بہ کنت۔  إے کار پہ کٹـّر یا بنیادپرست و شاؤنسٹان روا  بیت کنت۔ چمشکا إشان چشین سلــّین پدنام رستگ۔

إے راستی هم سرگوز کنگ مہ بیت کہ ھنچین سر ماتان ودی کتگ  أنت کہ آ چہ ھر ھردچاریءَ بُرزتر فکر کن أنت و بے رھشونےءِ سوجانءِ ودارءَ پہ وداریگین راھانءِ دربرگا رھیج گر أنت۔  إے  ڈولین مردم ھما أنت کہ آوانءِ دل چہ راجءِ مھران سرریئچ  أنت و راجءِ سرا کسانترین زوراکیءَ اوپار کنگءِ توانش نیست إنت۔ إے ڈولین مردم ھنچین رھدربر گـشگ بنت کہ جاھے گون وتی کردان، جاھے گون ھیدان و جاھے گون وتی زگرین خونان پہ راجءَ دیم پہ آوانءِ منزلان کشک رندان کن أنت۔

 إے نہ چار أنت کہ آوانءِ روگا رند راجءِ چے حال بیت۔ یا أگر بہ رو أنت گڈا وتی راجءِ آزادیءِ شادھیانء توکا چہ بھر زیرگا زبھر بنت۔ إشیءِ بدلا آ زان أنت کہ زوراکی و زبھری گون دیر نندگ و رھشونی کنگا گار نہ بنت؛ پہ إشانءِ ولگوج کنگا راہ  دربرگ لوٹ أنت۔ راہ دربروک أنت کہ کشک رند أنت؛ پہ رھشونان مادن گيشین أنت۔ چہ ھمے راجی سران یکے یعقوب مھرنھاد گشگ بیت کنت۔

بازینان یعقوب مھرنھاد نہ دیستگ۔ ھچبر گون آئی گپ نہ کتگ، إی میل  یا کاگدے پہ آئي راہ نہ داتگ، نیکہ چہ آئیءِ نیمگا تچکا إشان حال یا خبرے دستا کپتگ۔ نہ زان أنت آئی چہ کجا �ٹک وکھولءَ دراتکگ۔ آئیءِ کاربار چے إنت؛ تعلیم ئی چنچوک دربرتگ۔ گون إشان مهرنهادءِ پجاروکی یوکا گون آئیءِ شنگ بیتگین نبشتانک و مان دیوانان درشان کتگین گپان بیتگ۔  إشانءِ وانگا و إشکنگا رند واجہ مھرنھادءِ فکرءِ یک عکسے وتی مغزءَ ٹھینتگش۔   إے ندارگ راست گشی، حق گشی، عمل، قربانی، مردمی دوستی و أمنءِ سکینءَ دات۔

أگر ما راجدپران بہ چارین، ما گندین کہ ھمے ڈولین فکرانءِ واھندین مردم بیتگ أنت کہ پہ لتگمال، شد لاپ و درتگ پچّين مردمان مان تھار و لنجین شپان روژنے بلینتگش کہ إشی پہ نیزگار و پد منتگان یک سیرلاپی و دیمرویءِ اُمیدے زندگ کتگ۔

چہ پھکان برزتر؛ ھمے امیدءِ برانز سبب جوڑ بیتگ أنت کہ الس إشانءِ چيرا سرجم بہ بنت، تپاکیءِ بیرکان چست بہ کن أنت و دیم پہ منزلان رھیج به گر أنت۔ ألبت چه رھیج گرگا پیسر مدام ضرورت بیتگ کہ کسے کنڈیلءَ دستا بہ کنت و رندی مردمان چہ رھسرانءِ کنٹگ و ڈوکان ڈاہ دیان بہ کنت۔

یعقوب مھرنھادءِ بلینتگین رژنءَ مروچی مغربی بلوچستانءِ بلوچ گون یکا دگرا چہ پیسرا باز نزیکتر آرتگ أنت و پہ تپاکی و دیمرویءَ مادنین کشکے ھم رستگ۔ نین رھشونانءِ سرا إنت کہ بارین آ نِند أنت، ندارگ چار أنت کہ چونکا  إے رژنءِ بزانز إیرموش بنت، و مادنین راہ موسمی بدلیانءِ کارپدان گار بیت۔ یا پیش کنز أنت و ثابت کن أنت کہ یعقوب، و آئی ڈولین ھزاران کس کہ یوکا پہ راجءِ خاطرا ظلم و زوراکیانءِ دیمپان بیتگ أنت؛ آوانءِ اُلگو أنت۔ و آوانءِ کشکءَ گار بیگا نیئل أنت۔