بلوچاں دشمنانی ھمدردی نہ لوٹ انت' سردار عطااللہ مینگل
رپورٹ: کیّا زھری، خضدار
وڈ ءَ چھ ھال انت کہ بلوچستان ءِ کماشیںراہ دربر سردار عطااللہ مینگل ءَ پاکستان پیپلز پارٹی ءِ چیرمین بے نظیر بھٹو ءِ اے جار باز بد برتگ کہ آئی ءَ گشتگ اگاں آ پدا پاکستان ءِ ھکومت ءَ کیت گڈا بلوچاں معافی دنت۔ سردار عطااللہ مینگل گشت کہ بلوچ کسی گناہگار نہ ینت ءُ بلوچاں تپنگ پہ وتی سرڈگار ءُ گلز زمین ءُ وتی راجی پجار ءِ رکینگ ءِ ھاتر چست کتگ۔ پاکستان ءِ زوراکیں ھاکم بلوچاں چھ بلوچ زمین ءُ مال ءُ میراثاں پلگ ھاتر ءَ فوجی آپریشن کنگ ءَ انت ءُ انگت ءَ پاکستانی ھاکم ءُ فوج ءَ بلوچستان ءَ ھزارانی ھساب ءَ بلوچ کُشتگ ءُ لوگ ءُ جاھگا تباہ ءُ ویران کتگ انت۔ بلے بانک بے نظیر بھٹو ءِ چماں انگت ھم بلوچ گناہ گار انت۔ آئی ءَ اے گپ ءُ تران گوں روتاکی رپورٹراں کت انت ءُ گشت کہ بانک بے نظیر نوزدہ سد ءُ ھفتاد ءُ یک ءِ فوج کشی ءُ بمباری ءِ گناہ گار ھم بلوچاں قرار بہ دنت معاف بکن۔
