Sahtiay sur gón Dawlat Hánay kasterén brát Mohabbat Háná do sál sári butagat. Surá shash máhá rand, áiá Dabaiá rózgáré rasetagat. Yak o ném sálá rand áiay chotthi bayagá at. Áiá hál dátagat ke démi máhay pánzdahá, á do máhay chotthiá áyagá ent.
Áiay áyagá chár róchá pésar, áiay masterén brát Dawlat Háná Sahtiay gwará mard pa nárawái dist o doéni koshtant. Cha patth o pólay rapórthá paddar but ke koshókay gayratá báhand kortag. Áiá wati neshár o áiay “áshná” har doén hamá damán o hamá jágahá katl kortant o jergahá gón yak tawárá é gayrat o lajjay kósh jáhi karár dát o mard o zál syahkár léketant o D.C.á wati “aywárdh” é paymá dém dát ke syahkáriay kósh chó é dega kóshá lékag mabit o Dawlat Hán kayd o banday sezá dayag mabit.
Man mesl bon tán sarán padá hurtiá cháretagat o sharriá wántagat. Yak gwáhé wati bayáná gwashit ke é “áshná” pa wati óláká kadimay geragá hamá bégáhá áyáni halká átkag. Gwashtagi: “Mani drájén ráhé, man pa wati oshterá kadima zurán, bárén démterá rasit yá narasit?” Dawlat Háná áiárá kadim pa bahá dátag.
Mosáperá kadim oshterá laddhetant o pa rawagá roksati gept ke Dawlat Háná gón áiá gwasht: “Nun tahármáhi ent o jambar ham sará ant. Taw shapá gón má bejall, sohbá bám ke dant, beraw.” Warnáyá marháh kort. Áiay mennati gept o pa rawagá pád átk. Dawlatá á padá saláh jat, gwashti: “Marháh makan, chó mabit ráhá rad bekanay yá náháréay warhárli bebay. Gorhá warnáén mosáper jallet. Má drostán yakjáh nán wárt. Harkas wati gesá shot. Sohbá márá samá kapt ke mehmáná gón Dawlatay brátay warnáén janá wati dast o dém syáh kortagant.
Maná báwar nabut ke pa katrahé o damánéá mard o janay áshnái o do darámaday yakjáhi o démsyáhi amal buta kant. Man gwáh o molzem o dráh padá lótháéntant. Cha molzemá ke joston kort áiá gwasht: “Sáheb! Mani neshárá cha mani brátay darmolkiá rand baddasti bená kortagat, chosh ke halkay zálbulán wati halwatán yakdomiá josta kort ke Sahtiay láp parchá chó gwát gerán ent. Kaséá gwasht ke ‘marday bázén zarr o sohráni pig ant.’ Degaréá gwasht ke ‘dapi chó heláriá drahén róchá rómostá ent, piga najant o lápa naródénit, dega ché bekant?’ Bale márá é gomán néstat ke á wati démá syáh kanagá ent o dráhén kothomay démá tápagé lagáshagá ent. Man á shapi agan é mosáperén warnáay gwará mageptén, mani brátá wati lógiay lápporri bedistén, áiá wati delá ché gwashtagat.”
Meslay tahá, na gwáhán, na molzemá o na membarán Sahtiay lápporriay zekr kortagat. É pa man o pa mokaddemahá nókén o ehmén gálwáré at, gwáhi o shónkárié at ke áiay jorm o jormay amalárá nókén rangé dáti. Molzem dape wat gwashagá ent ke mani brátá wati janay lápporri bedistén, áiá wati delá ché gomána kort.
Man gwasht: “Taw rásta gwashay, sharrén jan o shiri ólák anámati shay naant.” Dawlatay pet ke mokaddamahay masterén gwáh o wati gayratmandén bacchay wakil at, bé jostá gwashti: “Sáheb! Mani neshár wat baddasté at. Hodá bezánt cha kadi o gón kay kayá wati démi syáh kortagat. Agan á shapi gón bagjattá gerag mabutén, áiá mani pardaysién warnáyárá, gón áiay sar bayagá lápay kóthek pa mestági dátagat. Dinnabógán gwasht ke tai nesháray zahgá damán o katrahéá dáshtagat agan máti koshag mabutén, do chár róchá rand allamá wadi butagat. Sharr but ke má cha náhakkén hónéá bacchetén.
Lápporrén zálé ke áiay zahgay wadi bayagá damán o katrahé bedárit chón gón damán o katrahéay mosáperéá “áshná” bit? Á máh o nókiay sandá wati jenday jódá jwába dant. Gón bagjattá chón joptia bit? Maná báwar nabut ke Sahtiay mawtay sawab yak shapay mehmán ent ke tahármáhén o syáhshapay syáhián gár o gomsár but. Man mokaddemah “Kráym Bránchárá” dát ke eshiay patth o pólá cha nóksará bekant.
Mani démá do rapórth ant, yakké Kráym Bránchay nóksaránay patth o pól ent o domi har róchi kráym rapórth ent. Har do yakkén habará gwashagá ant. Awaliá sarjamén patth o pólá rand pakkáiá wati rapórth dátag ke Dawlat Háná gón wati brátay sharrang o warnáén janá, brátay rawagá rand pa zór o narawái nájáhi kortag o néth áiay láp porr kortag.
Áyán hál raset ke Mohabbat Hán do chár róchá rand kayt o sara bit. Dawlat Háná tors mán delá kapt ke áiay brát lógiá lápporriá begendit, á wahdá á allamá josta kant o jan áiá hakkén hálá zarura dant. Gorhá pa áiá hayr naent. Áiá pa wati syahkáriáni chér dayagá bécháragén mosáperén bagjatt náhakká syahkár kort. Mosáper, bánór o kódak démhóni dátant ke balkén áyáni hón áiay syahkáriá gár bekant.
